Kerala Travels Kerala Classifieds Kerala Index Kerala Education Yellowpages Kerala Hotels Kerala Tourism Kerala Jobs Kerala Homestays
Kerala.com-Kerala Events-Kerala News- Kerala Realestate-Kerala Travels
Kerala, Kerala tourism, Kerala travels, Kerala hotels
Malayala Manorama  |   Mangalam   |   Madhyamam   |   Mathrubhumi   |   Deepika   |   Metro Vaartha   |   Kerala Kaumudi   |   Deshabhimani   |   K Vartha   |   Webdunia   |   Marunadan Malayaly   |   One India
 
അദ്ഭുതം കാത്ത്‌ ബാഴ്‌സ

ബാഴ്സലോണ: ന്യൂകാമ്പിൽ ഒരിക്കൽകൂടി ബാഴ്സ ആരാധകർ അദ്ഭുതം പ്രതീക്ഷിക്കുന്നു. ടൂറിനിലെ പുൽമൈതാനത്ത് യുവന്റസിനോട് തകർന്നടിഞ്ഞ ബാഴ്സലോണയ്ക്ക് ക്വാർട്ടർ ഫൈനലിന്റെ രണ്ടാംപാദത്തിൽ 3-0 ത്തിന്റെ കടംവീട്ടി സെമിഫൈനലിലേക്ക് കടന്നുകയറാൻ വെറും ജയംമാത്രം പോര. പ്രീക്വാർട്ടറിൽ പി.എസ്.ജി.യെ മറികടന്നതിന് സമാനമായ അദ്ഭുതരാത്രിയാണ് കറ്റാലൻപട മോഹിക്കുന്നത്. ചാമ്പ്യൻസ് ലീഗ് ഫുട്ബോളിന്റെ രണ്ടാംപാദ ക്വാർട്ടർഫൈനലിൽ ബാഴ്സലോണ ബുധനാഴ്ച രാത്രി സ്വന്തം തട്ടകത്തിൽ ഇറ്റാലിയൻ കരുത്തരുമായി കൊമ്പുകോർക്കും. മറ്റൊരുമത്സരത്തിൽ മൊണാക്കോ ബൊറൂസ്സിയ ഡോർട്മുൺഡുമായി കളിക്കും. ബാഴ്സ - യുവന്റസ് പി.എസ്.ജി.യുടേതുപോലുള്ള പ്രതിരോധമല്ല യുവന്റസിന്റേത്. കാലങ്ങളായി പൊരുതി ഉറച്ചുപോയ കോട്ടയാണത്. ജോർജിയോ കില്ലിനി, ലിയനാർഡോ ബനൂച്ചി, ഡാനി അൽവ്സ്, അലക്സ് സാൻഡ്രോ എന്നിവരുയർത്തുന്ന യുവന്റസ് പ്രതിരോധഭിത്തി തുളയ്ക്കാൻ മെസ്സി-സുവാരസ്-നെയ്മർ ത്രയത്തിന് കഴിഞ്ഞാൽ ബാഴ്സയ്ക്കു മുന്നോട്ടുപോകാം. അല്ലെങ്കിൽ കറ്റാലൻപടയ്ക്ക് ക്വാർട്ടറോടെ മടങ്ങാം. ആദ്യപാദത്തിലെ ജയം (3-0) യുവന്റസിന് ആത്മവിശ്വാസം പകരും. എന്നാൽ പ്രീക്വാർട്ടറിൽ 4-0 ത്തിന് ആദ്യപാദത്തിൽ പി.എസ്.ജി.യോട് തോറ്റശേഷം അദ്ഭുത പ്രകടനത്തോടെ രണ്ടാംപാദത്തിൽ 6-1 ന് ജയിച്ച് വിസ്മയംസൃഷ്ടിച്ച ചരിത്രം ബാഴ്സയ്ക്ക് കരുത്തേകും. ഫുട്ബോൾചരിത്രത്തിലെതന്നെ വലിയ തിരിച്ചുവരവുകളിലൊന്ന്. പ്രതിരോധത്തിലെ പഴുതടയ്ക്കാനാകും ബാഴ്സ പരിശീലകൻ ലൂയി ഹെന്റീക്കെയുടെ ശ്രമം. പരിക്കുകാരണം ഹാവിയർ മഷെറാനോ കളിക്കാൻ സാധ്യതയില്ല. സെൻട്രൽ ഡിഫൻസിൽ ജെറാർഡ് പീക്വയ്ക്കൊപ്പം സാമുവൽ ഉംറ്റിറ്റി വന്നേക്കും. ജോർഡി അൽബയെ ആദ്യ ഇലവനിൽ ഉൾപ്പെടുത്താൻ സാധ്യതയുണ്ട്. ആദ്യപാദത്തിൽ പ്രതിരോധപ്പിഴവുകളാണ് ടീമിനെ തകർത്തത്. മറുവശത്ത് ഇരട്ടഗോൾ നേടിയ പൗലോ ഡൈബാലയ്ക്ക് പരിക്കുള്ളത് യുവന്റസിന് ആശങ്കയുയർത്തുന്നുണ്ട്. ഹിഗ്വയ്ൻ-മാൻസൂക്കിച്ച്-ഡൈബല ത്രയമാണ് ടീമിന്റെ ശക്തി. മൊണാക്കോ- ബൊറൂസ്സിയ ഡോർട്മുൺഡിൽ 3-2 ന് ജയിച്ചത് ഫ്രഞ്ച് ക്ലബ്ബ് മൊണാക്കോയ്ക്ക് സെമിയിലേക്കുള്ള വഴി എളുപ്പമാക്കിയിട്ടുണ്ട്. ജയത്തിന് പുറമെ മൂന്ന് എവേ ഗോളിന്റെ ആനുകൂല്യവുമാണ് ടീമിന് ലഭിച്ചത്. ഇത് മറികടക്കാൻ ജർമൻ ക്ലബ്ബ് കഠിനാധ്വാനം ചെയ്യേണ്ടിവരും. ഡോർട്മുൺഡിൽ ടീം സഞ്ചരിച്ച ബസ് സ്ഫോടനത്തിൽ തകർന്നതിന്റെ ആഘാതത്തിലാണ് ബൊറൂസ്സിയ കളിക്കാനിറങ്ങിയത്. എംബാപയുടെ ഇരട്ടഗോളുകളും സ്വാൻ ബെൻഡറുടെ സെൽഫ് ഗോളുമാണ് മൊണാക്കോയ്ക്ക് ജയം സമ്മാനിച്ചത്. ഒസുമാനെ ഡെംബാലയും ഷിൻജി കഗാവയുമാണ് ബൊറൂസിയക്കായി ഗോൾനേടിയത്. ഫ്രഞ്ച് ലീഗിൽ മിന്നുന്ന ഫോമിൽ കളിക്കുന്ന മൊണാക്കോയെ മറികടക്കാൻ സ്വന്തം തട്ടകത്തിൽ അവസാന ആയുധം വരെ ജർമൻ ക്ലബ്ബിന് പ്രയോഗിക്കേണ്ടി വരും.

 
 
 
Hosted and Maintained by www.kerala.com & www.Indias.com by 
Worldviewer Dot Com (India) Pvt. Ltd.
 & Worldviewer.in , USA
"Your Home, Your Town, Your World." Mail to:  info@kerala.com